إستشاره إلى للخبراء

[NissaN 1990]

لا يدخل إلا أهل اليوكن فقط

يا أخوان السلام عليكم ورحمة الله وبركاته عندي أستشاره الله لا يهنكم وعلى ما يقولون ما خاب من أستشار
أنا عندي جيبي كحيلان باترول موديل 90 ودي أحيله للتقاعد وأشتريلي سياره عمليه وشكلها زين ومرتبه
ففكرت باليوكن الأمريكي اللي من تحت ال 99 على قد فلوسي وشرايكم فيه وش عيوبه وش مميزاته هل هو مريح في الخط هل عملي بالبلد هل هو قوي بالبر ومن ناحية الصيانه بشكل عام وأي أحسن الدبل أزرار أو قير علماً بأني أحافظ على السياره ولا ني راعي تطعيس ومطامر صحيح أني راعي بر بس أروح بركاده وأصون السياره أول بأول يعني أحافظ على السياره وأبديها على نفسي وشكراً لكم

طبعاً ما فيه غير أمريكي لأن السعودي ما ني لا قي نظيف بسعر معقول....

[NissaN 1990]

معقوله ما فيه أحد شقردي يرد لو يتنحنح والا لا زم نحط بالموضوع سياره للبيع عشان تدخلون بالموضوع !!!!!!

[عاشق السيل]

وعليكم السلام ورحمة الله وبركاته ،،

كيف تبي الشباب يدخلون وأنت مخلي الدخول حصري للشيبان أصحاب اليوكن ؟؟!!

عموما نصيحتي لك إذا كنت صاحب عائلة ومضطر لليوكن أقولك توكل على الله بس إذا كنت على كلامك راعي ركادة لأن الأمريكي يحتاج عناية أكثر من الياباني بكثير والله الله بالنظيف اللي مايتعبك بالصيانة ،،

أما إذا كانت عائلتك صغيرة أنصحك ومن القلب لاتبعد عن الياباني ،،،،

وألف مبروك مقدما وتقبل مروري لو إني راعي سفاري !!!!!!!




.

[NissaN 1990]

بيض الله وجهك يا عشق السيل كفيت ووفيت وأنا ما عندي عائله ولا أحد يركب معي بالسياره مغير أنا ولا عندي عائله لا كبيره ولا صغيره أنا ابي السياره لي براسي لأن العائله عندهم سياره خاصه ويوم فكرت أشتري جيب لقيت الجيوب مولعه ولا تلقى النيسان النضيف اللي يطربك فقلت على قد فلوسي آخذ أنظف يوكن بالرياض..أداوم عليه وأطلع البر إذا بغيت الطلعه...

[عاشق السيل]

وجهك أبيض يالغالي ،،

بس برضو خلك على الياباني لو كان غالي وتراها من واقع تجربة لسيارات كثييييييرة !!

الأمريكي مايصلح إلا الجديد أو أخو الجديد بشرط واحد ماعنده نية يبيع قبل عشر سنين ،،،،

وبالتوفيق ............





.

[السارحي]

شف يالغالي الياباني لا يعلى عليه واذا انت راغب الامريكي فهذا شي ثاني

الياباني ماشاء الله عليه تشوف كل سنه احسن من اللي قبلها بالمواتر اما الامريكي كل سنه اردى

وانا اقول خذ عطايا الله الجي اكس ار والله انها مواتر بر وديره ولا بغيت تبيعها بس عط اشاره

ويجونك الشرايه وبسعر زين بعد لكن طال عمرك الامريكي حتى لو انه جمس بيطيح من سعره

ودور من يشريه

مجرد وجهة نظر

[قناص الوعول]

تبي أرئي الي يجمد على الشارب لا تبعد عن الياباني الياباني تصليحه سهل خرابه قليل اذا خرب عليك تعرف تصلح بيدك اما الامريكي هو ابو الخربات اذا خرب ما ينعرف خرابه ولا كل ورشه ترف له واذا جيت ورشة يقالهم فاهمين تغير من قطع كثير والخربان قطعه وحده يعني تخسر كثير اذا خرب عليك وازيدك من الشعر بيت اذا خبر عليك في طريق مقطعه بتقعد تفرج في المكينه ما تدري ايش الخراب منه السياره الامركيه غثاء وبس
عقلك في راسك وتعرف خلاصك

[NissaN 1990]

شكراً للأخوان عاشق السيل والسارحي وقناص الوعول وأقولكم نصايحكم على راسي وإنشاء الله إني أبي آخذها بعين الأعتبار...بس موتري مثل ماقلتلكم صار شايب وصار يطلب واجد ولهذا السبب فكرت أتخلى عن النيسان لأن ما عندي دراهم تجيب اللي بالخاطر... الله يرزقنا ويرزق جميع المسلمين ...

[لبيد بن ربيعة]

نصيحة محب ابتعد عن اليوكون إذا كان أمريكياً مستعملاً حتى لو وجدته نظيفاً ؛ لأنه خائن يخونك في أحلك الظروف ولنا معه تجارب مريرة وطويلة

وفقك الله أخي للسيارة التي تسعدك وتهنيك ،،

[NissaN 1990]

شكراً يا أخي محمودمحمود والله يرزقنا بالسياره الزينه النظيفه أنا ما كنت متوقع أن سمعت اليوكن كيذا عند الناس اللي مجربينه

[الدحبول]

اليوكن موتر ممتاز
احرص على النظيف إذا خذت نظيف فخذها مني رح تحب الامريكي
قطع غيارها رخيصة ومتوفره
وعملي

[NissaN 1990]

يعطيك العافيه أخي الدحبول وشرفت ونورتنا يابو الفزعات