المساعد الشخصي الرقمي

مشاهدة النسخة كاملة : ماهي سلبيات الكروزر والباترول؟ وسجل اقتراحك لِمصمّمها..


نوحان
09/09/2007, 03:02 PM
اسعدالله اوقاتكم

شرايكم نضع موضوع يسجل جميع عذاريب مصنّع سيارة الباترول والكروزر
وانا ركزت على هاالسيارتين بحكم ان معظمهم في متناول الجميع
واكثرهم انتشار
والقصد اننا نناقش في اطار الفائدة والتنبيه
علىّ وعسى ان يخرج احد منّا في الحوار بفائدة او معلومة كانت غايبة عنالجميع
والمطلوب من المشاركين وخصوصاً اللي عندهم خبرة قديمة بذا السيارات
ان يبدي رأيه ونتقاده في كل ماهو" زايد" أوناقص"او تبديل موقع غرض" او خلل "او خراب متكرر" في هذي السيارتين

(والاقتراح مهم)

وانا متأكد اننا راح نطلع بنتيجة وفائدة خصوصا من اهل المكاشيت الخبراء

--

انا ببتدي بأنتقاد السيارتين معاً

لأن اقتراحي يخص سيارة الكشاته بشكل عام
وسيارة الجيب عامّتاً صممت للمشاوير والرحلات اللي تكون بعيد عن خدمات البلد
وقصدي اهو تركيب خزان ماء بشد الوكالة..ليه مايحطونه؟ وهو اهم من اشياء كثيرة في السيارة
ولأن دائما تركيب الوكالة يكون وضعة مدروس
وغير عشوائي وبيحطونه بمكانه وذرب ومخفي ..معناه ان مشتري الجيب يبي هذي المواصفة المهمة!

تسجيل اقتراح
باترول 585
10/09/2007, 01:21 AM
هلا اخوي مقناصي

شف انا مع باترول فتك وواحد من العيال معه فكس ار طبعا كلنا 2006
الي الاحظ في ذا السيارتين الصرفيه الزياده وانا اقارن الباترول بصرفية الباث لانه قبل كان معي باث وكنت اقول انه يصرف لاكن يوم جرب الباترول قلت يازين الباث

والمشكله في الكروزر الثقل الزايد يعني ماصار صاير اشبه با الجمس السوبربان من ناحية الثقل
والمشكله ايضا في الباترول التفكك السرييييع وتبخر الزيت (ليس نقصان الزيت التبخر مع الحراره الزائده فقط لاحد يفهم غلط)
وهذاي المشاكل الي عندي ومشكور.. ... ... ..
سيد النشاما..
10/09/2007, 01:47 AM
جزاك الله خير ياالأخ مقناصي على هالموضوع الجميل

ونسأل الله أن يوفقنا في الدنيا والأخرة ......العيب اللي ألاحظه في الباترول هو

صرفية البنزين + التهربد

فلو يعالجون هالمشكلة بيصير الباترول شي ثاني
سراب الصيف
10/09/2007, 02:18 AM
السلام عليكم
بالنسبه للباترول لو يحطونه شنطه كان يا سلام
اللاند كروزر لو يخففونه لانه مثل الجمس
ثالث شي لو يحطون فرارات لكل السيارتين
عاشق السيل
10/09/2007, 06:02 AM
مثل ماقلت أخوي لويحطون تانكي للماء وبطارية إضافية وفتحات للولاعة في كل مكان وزيادة حجم تانكي البنزين وخدمة الجي بي إس ( إحداثيات ) ،، كل هذي مهمة جدا بالجيب ،،

أما الباترول يصرف بنزين !! هذا كان أول والحين الحمد لله أفضل بكثير خاصة إذا كان تماتيك ،،
وسالفة إن الباترول يتفكك أو يتهربد !!! من 98 وفوق الموتر جدا متماسك وهذا عن تجربة لأكثر من موديل ،،

تشكر يالغالي على طرح الموضوع ،، بس تراها تنفيس عن مافي الخاطر وإبداء اقتراحات وآراء لكنها للأسف ماتقدم ولاتأخر لأن المصمم يبي يسوي اللي براسه وحنا علينا نشتري ونسوق والحمد لله اللي سخرهم لنا وعطونا مثل هالمواتر نوسع صدورنا عليها بالصمان والدهناء والخطوط الطويلة !!!!!!

بيض الله وجهك وتقبل مروري ....




.
طحنون
10/09/2007, 10:10 AM
وكذالك الونش بالباترول يصير اختياري اللي يبي ونش يشتر الفئه اللي تكون بها ونش ولا يكون على فئه الفل ابشن فقط وكذالك بطاريه اضافيه او على الاقل يكون لها مكان خاص مثل الكرورزوكذالك يجهزون عفريته للتغريزات الجامده زي اللي تجي على مواصافات استراليا
احب البرواهله
10/09/2007, 10:20 AM
في الباترول عيب واحد فقط مراتبه نازله وأنت راكب ما تشوف الكبوت ومزاياه لا تعد هذا من وجهة نظري واللاند كروزر ماأعرف عنه شي الله يستر على أهله ويكفينا وأياكم شر السيارات
نوحان
10/09/2007, 12:56 PM
مساكم الله باالخير

الحمدلله.. مثل ماتوقعت، الموضوع اصبح مفيد بوجودكم ومشاركتكم
على الأقل لو اللي يبي يشتري موتر ولا عنده خبره من قبل
بمجرد دخولة بذا الموضوع راح يغنيه عن الحيره وكثر السؤال



بواسطة: طحنون
وكذالك يجهزون عفريته للتغريزات الجامده زي اللي تجي على مواصافات استراليا



اخوي طحنون
ممكن توظح لنا اكثر عن هذي العفريتة. بارك الله فيك
القماري
10/09/2007, 01:49 PM
موضوع طيب وجيد
بخصوص الباترول أقترح التالي:-
1- يركب فيه منفاخ هواء قوي وسريع (شد بلد) هذه أهم ميزة يجب ان تتوفر في السيارات الرباعية وخصوصا لمحبي التطعيس والرمال
2- يركب فيه جهاز ملاحه
3- يركب فيه ونش سحب
4- يخفف وزنه قدر الإمكان
5- يركب فيه خزان ماء
6- أن يكون الباب الخلفي شنطة وبشرط أن لايوضع السبير أسفل السيارة
7- يبقى كما هو (دفرنشين ) وليس عكوس
8- يكون موديل به كل هذه المواصفات (كمواصفات أساسية ستاندرد وليس إضافية ) ويبقى أنواع فخمة كالسوبر سفاري به فتحة وجلد وسيدي .. الخ

أتمنى ان تصل هذه المواصفات للمصنع او لهيئة المواصفات والمقاييس أو للوكيل أو لأي شخص معني بهذه السيارة الجوهرة ....

وألف شكر لصاحب الموضوع
الدبل الثقيل
10/09/2007, 02:30 PM
الباترول واللاندكروزر يجيبون فئه تشبه الاستاندر مافيه ايرباق ولا فرامل اي بي اس ولاتخشيبه ولاغ جناح ولا الخرابيط اللي مالها سنع ...... لكنها مكيفين وتانكيين وقزاز واقفال الابواب والمرايات كهربا ....... يكون الجنط وسط يعني 7 انش وكذلك الكفر لاعريض ولا نحيف ويكون فيه طول زي البالون بس دعسه عاديه ماهي رمليه ........ واللمبات الأماميه تكون قويه .... وماتكون الأمور الالكترونية كثيرة ......... وكذلك فرارات تمتيك زي اللي جات على الشاص 2002 السعودي ......... هذا اللي عندي وجزاك الله خير .......
الدبل الثقيل
10/09/2007, 11:30 PM
يرفع للفائدة
نوحان
11/09/2007, 01:31 PM
بواسطة:القماي
يركب فيه منفاخ هواء قوي وسريع (شد بلد) هذه أهم ميزة يجب ان تتوفر في السيارات الرباعية وخصوصا لمحبي التطعيس والرمال


الميزه هذي انا شفتها في سيارة الجيب (انفوي) الشفر الصغير
ومثل ما قلت" صاير عليه شغل.. وصحبها مايستغني عن المنفاخ ابد

وش نسوي! الزين مايكمل
نوحان
11/09/2007, 01:35 PM
يرفع للفائدة

اخوي " الدبل الثقيل ... بيض الله وجهك
نعم يرفع للفائدة
باترول للأبد
11/09/2007, 02:02 PM
ماقصرت يا اخوي على الموضوع الحلو والمفيد

وأنا اشوف الباترول ماعليه كلام ابد اول شي قوة وتماسك وشكل وراحة ومواصفات وفخامة وشكل حلو

بس اللي ينقص الباترول الونش وشاشة النفقيشن

والباترول بكل موديلاته عاجبني

والشي اللي موعاجبني سوء الوكيل في السعودية

..................................................

واللندكلوز حلو بس مشكلتة ثقيل ومبالغ في سعره
طحنون
12/09/2007, 12:14 AM
مثل هاذاي العفريته او الرافعه مهمه جدا في الازمات والمهمات الصعبه بس انها تكون في مكان ذرب الاخ العزيز مقناصي هاذي يجيبونها بس بالطلب واستخدامها سهل جدا يعمل لها قواعد من ست نقاط بالسياره من جميع الاتجاهاتhttp://www.mekshat.com/pix/upload/images48/mk9828_7641397006.jpg
عاشق السيل
12/09/2007, 05:57 AM
الميزه هذي انا شفتها في سيارة الجيب (انفوي) الشفر الصغير
ومثل ما قلت" صاير عليه شغل.. وصحبها مايستغني عن المنفاخ ابد

وش نسوي! الزين مايكمل


من يقول الزين مايكمل حلاه ،،،،،،،،،،،، وكل شي بالسفاري اكتمل !!




.
ع.ف.الدرويش
12/09/2007, 09:55 AM
صرفية البنزين + التهربد



يا جماعة الخير..:)

معي باترول 2004 وله الآن تقريباً 4 سنوات والله يطعمني خيره ويكفيني شره ولا لاحظت شغلة الهربدة ولا دخلته الوكالة تربيط او غيره ولا صادفت تبخير او حتى تهريب زيت حتى صرفية البنزين مهنا صرفية لا وبنزين 95 وللمعلومية استخدمه بكل شيء وللبر وللمدينة وبكل مكان.. واثنين من اخوياي واحد معاه سوبر سفاري 99 وماشي الآن فوق الـ450ألف ما قد إشتكى منه.. والثاني ربع باترول 2001 وماشي تقريباً 500ألف ونفس الشيء ما إشتكى منه إشترى سيارة ثانيه VXR 2001 ما جلس معاه إلا 3 أشهر وباعه يمدح العزم الوقوة لكن يذم الإستهلاك والثقل مع إنه نظيف حيل..

فما أدري من وين تجيبون الكلام وهالعيوب..؟ واي الموديلات تقصدون..؟

أرجو أن كل واحد يشارك هنا يذكر موديل الجيب اللي معاه او على الاقل نوع سيارته.. لان فيه بشر ما معاه الا فكتوريا والا هايلوكس (ولا قد جرب الجيب) ويذم ويمدح بمزاجه..؟؟؟

وللجميع الشكر..