ابي منكم المساعده: ( عندي جيب نيسان ربع واب مشورتكم )

[السديراوي2003]

ياشباب انا عندي جيب ربع نيسان موديل 93 شاريه من حوالي اسبوعين بس لاحضت عليه بعض الاشياء الا وهي كالتالي:

1- الحراره ترتفع عندما اشغل المكيف واقف لمدة لا تتجاوز الاربع دقائق و تصل الى النص - بالاضافة عند ما اذهب النفود واشب شوي على الموتر يعني مهوب ذك الشب مره مثلا ادوسله علشان ارقى طعس ما اقعد خمس دقايق الا الحراره قابه واصله النص

2- عندي امبير البنزين يلعب اعبيه فل اروح مشوار ما يتعدى العشرين كيلو القاه واصل عداد التانكي الى النص

3- عندما الف بالدركسون اسمع صوت وانا واقف طبعا هل هوعادي او لا

وفي الختام ارجوا منكم ابداء مرئياتكم وتجاربكم مع هذا النوع من المديلات وماهي التعديلات التي تفيد
وارجوا منكم اعطائي ورشه تكون ممتازه في التعامل مع هذه الموديلات ولكم مني جزيل الشكر

[النقيرة]

هلا بك اخوي يالسديراوي ..
انا معي ياطويل العمر اخو موترك باضبط والحرارة اللي في موترك مهيب طبيعية العادة تحت الربع واذا زادت مع الوقفة في الشمس توصل فوق الربع بشوي .
لكن بالنسبة لاصلاحها ماعندي خبرة والله والشباب مهوب مقصرين معك ان شاء الله.
صوت الدركسون عندي اذا لفيت والموتر واقف بس خفيف .

[بنــي زيــد]

السلام عليكم و رحمة الله و بركاتة
انا اقول احتمال مهوب اكيد انه من الثلاجة لأ اخوي صارت له هالمشكلة و طلعت الثلاجة مع العلم ان موتر اخوي مهوب نيسان
على العموم مر به على ورشة و تأكد

[باترول 4×4]

بالنسبة للحرارة مسبباتها كثيرة ، وقد تحدث الإخوة عن هذه المشكلة في عدة مواضيع خذ منها هاذين الرابطين :
http://www.mekshat.com/vb/showthread.php?t=97034

http://www.mekshat.com/vb/showthread.php?t=87937
وبالنسبة للصوت اللي يطلع إذا لفيت الدركسون - ماحددت نوع الصوت حنة ولا صرير - عموما إذا كان حنة تأكد من زيت الدركسون يمكن يصير ناقص أو فيه بعض الماء وإذا ماكان كذا تأكد من دودة الدركسون .
وبالنسبة لامبير البنزين إذا كان يلعب يعني يتحرك مع المطبات أو يلعب من نفسه فيحتاج لتغيير السبرنق اللي داخل ، أما إذا كان مرة وحدة ينزل حول النصف ويثبت ولا يتحرك إلا إذا نقص البنزين تحت النصف فيتحرك مع نقصان البنزين حتى يفضي التانكي ويصير على مؤشر E فما فيه شيء إن شاء الله طبيعي

[escape_man]

سلام عليكم

حريصين حيل ياهل سدير

انا اشوف الموتر ماهنا شي يعيبه علشان يضيق صدرك خاصة ان موديله 93

الواتر هذي يبيلها صبر وتلقيطات كل اسبوع او شهر او بالمواسم

الحرارة ... بالتفصيل من حكم تجربتي:

رح للمروحة والموتر طافي .. لفها بيدك .. اذا خفيفة مره ولا تاقف الا بعد لفه ونص فمعناها تماتيكها خربان اما اذا وقفت في ربع لفه فهي جيده وانتقل للخطوة التاليه.

اطمر لقطع الغيار وغير وش اسمه وش اسمه والله نسيت ... الي يسكر الرديتر وتفره بيدك ... المهم .. عب الرديتر واطلع مشوار واجلده جلد وارجع وطف الموتر .. ثم شغله بعد مايبرد شوي وشف هل نقصت المويه واجد ولا مانقص شي... اذا نقص الماء فعناها ياتهريب بالرديتر او به تنسيم بالليات وهذي صعب انك تلاحظه (فيه لي يمين المكينة احرص على تغييره والظاهر انه الي يركب بكوع البلف حق الماء) .. نكــــمل .. اذا المويه تمام وهذا مستبعد فمعناها تنظيف وتصييخ الرديتر او يكون هلكان وتغيره او البلف يكون خربان.

هذي اسباب ارتفاه الحراره المشهوره .. ولا فيه اسباب غير مثل الديلكو وخلافه.

[رحال حائل]

السلام عليكم ورحمة الله وبركاته : شف وانا اخوك مشاكل الحرارة كثيرة ومن الصعب نتطرق لها كلها لاكن نبي نحلها وحده وحده من وصفك انا اتوقع ان المشكله من اوتماتيك مروحة الماكينة ابيك تطفي السيارة وهي حارة وتمسك المروحة وتقوم بتحريكها بسرعه بس نفس حركتها مو تعكسها وتشوف هل هي خفيفة يسهل ادارتها ام ثقيله وان ادرتها هل تتوقف بسرعة ام لا فإن كانت خفيفة ولا تتوقف بسرعة فمشكلتك ان شاء الله محلولة قم بتغيير الأوتماتك حق المروحة وحبذا لو تغير المروحة لريش اكثر من الموجودة ... لك علي ان افيدك بعد ان تفحص سيارتك بنفسك ولم تصل لحل ... آمل اني افدتك من هذه الناحية اما امبير البنزين اكيد من عوامت البنزين داخل التانكي يجب تغييرها .... اما الصوت عند لف الدركسون ربما تحتاج الركب للشحم وكذلك ذراع الدركسون يحتاج كذلك للشحم قم بالذهاب لأقرب بنشري واطلب منه ان يشحمه وان يركب لك مشاحم ان لم تكن موجوده سابقا او تلفانه ... تحياتي لك