السلام عليكم ورحمه الله وبركاته
تحيه عطره للجميع
كثر الكلام عن بطل الدروب نيسان باترول ودارت حوارات بالمنتدى بيني وبين بعض الاعضاء وبعضها وصل الى الواتساب والكل يريد مني الكلام عن هذه السياره والحمدلله وله الفضل والمنه من قبل ومن بعد انا جربت بطل الدروب بكل انواعه ( LE موديل 2010 بقوه 400 حصان - SE قير عادي 2013 بقوه 320 حصان - SE قير تماتيك 2013 بقوه 320 حصان )
بالبدايه احب اقولكم انها سياره فريده من نوعها بتقولون لي كيف بقولكم السياره وهي واقفه قدامك تحس انها ضخمه وصعبه القياده ولكن بمجرد ماانك تجلس على كرسي السائق وتمسك الدركسون هذا الاحساس يتلاشي نهائيا وتحس بمتعه القياده وكانك تسوق سياره صغيره لما تحسه من سلاسه في التحكم وهذا الشي لاحظته في جميع الانواع
نجي عند النقطه كثيره الجدل وهي كيف الموتر في النفود وهل يتحمل او لا اقولها بعد تجربه الموتر قوي ويبيض الوجه في كل مكان ممكن تفكر تروح له مااخفيكم غرزت به في فنجال صعب الخروج منه بسياره بهذه الحجم ولكن الحمدلله الموتر ماخاب ظني فيه مع العلم ان سبب التغريز ليس السياره ولا ليس انا انما كنت مسيف على الفنجال وقابلتني سياره وجها لوجه اضطريت افرمل وازلق داخل الفنجال
فجأه تجمعو علينا مواتر كلن يقول بنسحبه قلت بنفسي النيسان ماينسحب وراسي يشم الهواء واشيك على هواء الكفرات وانسم له شوي ثم اعطيه ثقيل وريوس يوم شفته يستجيب ويرقى معي خفت احرق الكلتش قلت مابدهاش عطه واحد والحمدلله طلعنا بلا قلص ولا سحب
انا تكلمت بشكل بسيط وعلى استعداد للاجابه على اي استفسار بخصوص بطل الدروب واتقبل اي نقد واي اقتراح ولكن رجائي موضوعي هذا ليس للمقارنه لذلك لا احد يتكلم عن اي سياره اخرى سواء من ماركه ثانيه او سياره من نيسان نتكلم فقط عن بطل الدروب باانواعه
في الختام اخترت لكم كم صوره من قوقل اتمنى تعجبكم
ملاحظه مهمه : تابع الردود لمزيد من المعلومات والاقتراحات والاستفسارات
رد مع اقتباس