هب البراد ووجهته من شمالي =وجتنا علوم الحيا بالصوت والصوره
قم شغل الجيب تكفى يا بعد حالي =نبي لنا ديرة(ن) بالسيل مذكوره
النفس ملت من الجدران وظلالي =نبي السعة عن محيط الدار وقصوره
بالبيت كني سجين وجالس لحالي =حتى النظر لو نمده حاجبه سوره
نبي الوناسة معك يا طيب الفالي =نأخذ لنا بالفيافي والفضاء دوره
في ديرة(ن) مابها جوال وإرسالي =مرتاح بالك بلا صجه وفاتوره
نبي لنا فيضة(ن) وشعيبها سالي =تنطحك ريحة نفلها بأجمل عطوره
نقضي بها ليلة(ن) مع خوة عيالي =الكل منهم حكيم وصايب(ن) شوره
النار شبت وصفت حولها دلالي =وفراشنا حولها والنفس مسروره
أخفنا للنشاما صب فنجالي =فنجال بنن يرد الفكر لشعوره
ثم السوالف تجي ما فيهن هزالي =ليل القصص والقصايد ولعو نوره
هذي حلاة الوناسة بالخلاء الخالي =الروض الأخضر وريح العشب وزهوره