السلام عليكم ورحمة الله وبركاته
اليكم هذه السالفه
في سنة من السنين وعلى وقت الوالده الله يرحمها جانا واحد من الديره ومعه هديه
للوالده عباره عن سبع بط الوحده منهن كبر الخروف البربري
يافخذ الوحده منهن تقول قاروره ميرندا الحجم العائلي لامشت الوحده تعرج يالله تقل الورك
مثل حقين المصارعه اليابانيه الساموراي مدري اذاكان اسمها صحيح
وحطتهن الوالده رحمها الله تعالى في حديقه البيت والحديقه لها جدار ارتفاعه متر
يوم صار تالي الليل وهو يجيهن بس خبل وهو يقعد على هالجدار ماعمره شاف مثلهن
وتهول من كبرهن يحسب كبرهن على سنع مايدري ان اقلوبهن مثل حلاوة الحلقوم
وهو يستقعد على الجدار اشوي يوم لجلجن بالصوت تقول صوت صرصرة جنزير تركتر كتربلر لاهو راح عنهن ولاهو ذبحهن وخذ يالازعاج ككككككككككككك وماغير مراكض
وبطن الوحده تقل خلاطه اسمنت مابعد وصل دورها للتفريغ
انا كنت نائم وقمت على صوتهن وانا افتح الشباك ولاهن يخترشن والبس حاط رجل على رجل وماغير يتفرج وهن ماغير ككككككككك
حاولت اطرد البس اصوت له اهشه اكشه مافيه فايده الظاهر مايسمع صوتي من ملاججهن
يابن الحلال انقلع والا خذ مقسومك منهن وذلف اذبحهن كلهن بس فكنا والا انقلع
وكان الوقت بارد والنزول بهالبرد صعب وقائم من فراش دافي والله صعبه
اخذت لي حاجه وحلتها عليه اشوى يوم هج وارجع وحط راسي ونام
يوم صار عقب نصف ساعه وهو يرجع وعلى نفس الموال وانا اصحى من نومي
وحاول فيه مامن فايده وهالبط ماغير ككككككككك ولو ادري اني لورقيتهم عندي بالغرفه بيسكتن رقيتهن كلهن المهم اخذت عزكم الله نعله وحلتها عليه
وهو يروح المهم رجعت ونمت يوم اخذت اشوي الا وهو راجع وجايب واحد ثاني معه
يبيه يشوف البط
البس الثاني ماتخيل كبرهن قعد على الجدار ومسك راسه
هن شافن الاثنين عندهن ويوم ادهرت اصواتهن اقوى من اول صار صوتهن بوكلين يضرب في صفا
وانا اقوم حمق عليهن واطلع ام صتمه وامدها عليهن ناوي اذبحهن وعزم بساسه الحاره عليهن ولاقالت امي شي قلت ذبحتهن البساسه ليه ماحطيتيهن بشبك اجل من اول ليله ازعاج
يوم مديت البندق عليهن وانا اهون وصوب البندق للبس وانا اطلق عليه بس مدري وين
صارت الرميه هي بالضهر ولا بالبطن وهو ينحاش هو ورفيقه
يوم اصبحت وانا اقول للماما يانا ياهن بالبيت ماعندي استعداد للسهر يابن الحلال فرحة فيهن خلهن لو كم سوم وادور احد اعطيهن اياه قلت لاتدورين احد اوديهن انا للسوق وابيعهن فعلا يوم صار العصر ولاهن بالسوق احرج عليهن وبعتهن وشريت شبك
وحطيت فيه بلابل ونغاري وفري وجوزين ارانب وتيس وعناق (سخل ) وضب ولو لقيت قعود شريته
انتهت السالفه
وبعد ماكملت السالفه ارجوا ان اكون مااثقلت عليكم بهذه السالفه
وقبل الختام
سبحانك اللهم وبحمدك لااله الا انت استغفرك اللهم وانوب اليك
والله يحفظكم
رد مع اقتباس
المشاركة الأصلية كتبت بواسطة حمد69
