بسم الله الرحمن الرحيم
السلام عليكم ورحمة الله وبركاته
اخواني واخواتي المكشاتيه حياكم الله
هذي الله يسلمكم سالفة واحد راعي مور عايدي يكد منول
ولقاله حمل بقر من ديره الى ديره اتفق هو واللي مرسلهن على الأجره وعطاه اسم راعيهن مع الوصف
راعي المور حمّل البقر مع رجالهن الثور و توكل على الله ويوم وصل ديرة راعي البقر وهو ينشد عنه
ولقا واحد ونشده وقاله هذاك البيت اللي عنده نخل هو فلان اللي تنشد عنه وهو ينصاه
وصل للبيت وهو يشوف عشه بوسط النخل بوسطه صريف ( جدار من عسبان ) وفيها ثلاث شيبان
اثنين مستوين جلد على عظم والساق ما تفرقه من الفخذ – الله يرحمنا ان عطانا عمر وصلنا مواصيلهم - والثالث شايب بس نشيط
الشايب النشيط قام يجدل الشيبان القاضين زم 00 يم نصف العشه الثاني المهم وصله 00 سلام عليكم 00عليكم السلام انت فلان قال وصلت على خير
قال البقر بالمور وين تبين انزلهن قال راعيهن عند هكالحوش بس ابا اقول لاهل البيت يسوون قهوه
راعي المور راح وريوس على حوش البقر على شان ينزلهن ورقا للصندوق وهاش على البقر بعصا وتطابحن من الصندوق على الحوش الا الثور البيه عيا يتحرك هشه بالعصا اضربه مافيه فايده جره مع عصعصه رجفه والثور رابض تقل متوهن اخذله ربع ساعه يمكن وهو يحاول فيه بدون نتيجه وطرت على باله فكره وقام وجاب شوية قاز يمكن بقاعة فنجال قهوه وقم صبه بمناخر الثور واشخط الكبريت بخشة الثور00 وانقز يالثور نقزتين بصندوق المور والثالثه 00 عشرةأمتار تطبيحه وصك باب الحوش على البقر ورجع للعشه يتقهوى مع راعي البقر
الرجال راعي المور براسه سؤال ويتحاين الفرصه على شان ينشد عن الشيبان اللي جدلهم ورا الصريف واللي مالهم حس ولارس وفعلن حانة الفرصه وقال ياوجه الخير باين عليك انك بار بوالديك وابنشدك عن الشيبان اللي شفتهم وانا مقبل عليك اكيد انهم ابوك وعمك قال مالك لوا هذولا عيالي الكبار الله يختم لنا ولهم بالجنه راعي المور طارت بوهته وصلى على محمد واخذ اجرته وراح لسيارته ويوم وصل للسياره وهو يلتفت على الثور والا الثور بس يعمعم براسه تقل به وشره ويركب المور ويتوكل على الله
انتهت السالفه واملي ان تحوز على استحسانكم
وتقبلوا تحيات محبكم
النبهاني
رد مع اقتباس
المشاركة الأصلية كتبت بواسطة قوافي
