(بعض المراثي والتعزيات)
رثاء وتعزية في وفاة أحد الأقارب. . غفر الله له
( المغفور له بمشيئة الله/ سليمان بن محمد الفهيد)
أسألـك بالله ربــي يــا رحـيـم=يامديـر الكـون يــارب الأنــام
أسألك بأعظـم صفاتـك يـا عظيـم=يامدرّ الغيـث مـن عالـي الغمـام
طالبـك ربـي ولا مثـلـك كـريـم=مستجيبٍ لصوت يونس فـي الظـلام
تقبل اللي حِـط فـي القبـر البهيـم=قـدم أعمالـه ولا عـنـده كــلام
كل ما يملك.. غدا ..ضـده خصيـم=ما كسى جسمه سوى (مترين) خـام
ثبتـه يـارب.. بالقـول الحكـيـم=واجعل أقوالـه إلـى جـاوب تمـام
والهمـه يـارب رشــده ياعلـيـم=وموحشـات القبـر تجعلهـا سـلام
مؤمنٍ بك.. طايـع لـك.. مستقيـم=يشهـد المسجـد بفعلـه والإمــام
وتشهد الكعبه.. وزمزم.. والحطيـم=والطواف.. وركن بيتـك ..والمقـام
والطفل .. والكهل ..يشهد ..والحريم=مثل طيبه مـا رأت عينـي.. حـرام
أرزقـه يــارب جـنـات النعـيـم=واجعل الفردوس لـه أعلـى مقـام
موت ابو احمد صاب قلبي في الصميم=من بكاهـا العيـن صايبهـا جحـام
ما ألـوم اللـي غـدا عقبـه سقيـم=عقب ابو احمد عافت جفوني المنـام
عارفـه بالطيـب مـن عهـدٍ قديـم=خابره مـن يـوم أنـا تـوي غـلام
الوفـى يبكـي عقـب موتـه يتيـم=والمراجـل لبسـت بفـقـده لـثـام
والكرم والجـود مـن عقبـه عقيـم=فـي المعالـي مالـكٍ رأس السنـام
راح محبـوبٍ ولالـه مـن غـريـم=مسعـدٍ.. داره ..وجـاره.. والعَمَـام
يوم هم.. ويوم حزن..ويـوم ضيـم=يوم ستة مـن بعـد شهـر الصيـام
جيـت أعزيكـم وأنـا قلبـي كليـم=لا ذكرتـه صابنـي مثـل الهـيـام
مؤمنٍ بقضـاه مانـي بـه غشيـم=عـارفٍ آخــر حيـاتـي للـعـدام
وسنـة الله مابهـا الدنيـا مـديـم=ماضـيٍ فعلـه وحكمـه بالتـمـام
وكلنـا فآثارهـم نركـض همـيـم=نقتفيهـم.. مالنـا فـي ذا مـقـام
والزمـن وجهـه إلـى قفـى دميـم=لا انقلـب يدعـي علاويهـا حطـام
عفـت أنـا دنيـاي وأفهـم يافهيـم=والصلاة تخـص طّـه فـي الختـام
*** راعـــي مــــرات*** عبدالرحمن المجلي
الثـلاثـاء/ 8 /شــوال/1424هـ
****************************************
رثاء في فقيد محافظة مرات المغفور له محمد بن عبدالعزيز المسلم
عم الحزن وتبدل النور ديجور
** واقفت ليالي السعد والوقت قاسي
علمٍ لفاني أودع الدمع منثور
** انهد حيلي منه وانهار باسي
(ابن مسلم ) شرقي كميت مقبور
**وكلن على فرقاه امسى يواسي
الهم وثق في حشى الصدر دستور
** الله حسيبك يازمان المآسي
يالله انا طالبك يافالق النور
**يارافعن سبعٍ بليا كراسي
يارب تجعل ذنبه اليوم مغفور
** ياخالقن شم الجبال الرواسي
وتجعله في الفردوس راضي ومسرور
**ومن سلسبيلك يرتوي منه كاسي
حزنٍ يجيش بداخل الجوف ويثور
** إلى ذكرته صاب فكري عماسي
رفقة عمر ماهيب ايام وشهور
** انا اشهد اني عقب فقده بقاسي
لوني بكيته دم لاشك معذور
**ولوكان يفدا كان يفداه راسي
الطيب يشكي والكرم طاح مقهور
** والمرجلة تبكي وجتنا تواسي
اسمه بداخل لوحة ( مرات) محفور
** ومواقفه في ديرته دوم اساسي
والموت حق وننتظر لحظة الدور
** ماهوب ناسينا.. ولانيب ناسي
عبدالرحمن المجلي- راعي مرات
يوم الخميس 8/1/2015م
******************************
رثاء في فقيد الشاب علي عبدالله الروضان غفر الله ورحمه وجبر مصيبة أهله فيه
يامحمـد الروضـان هـذي مقاديـر=واللي كتـب باللـوح مامنـه فرقـا
حكمة ولي العرش مجـري التدابيـر=اللي يديـر الكـون غـربٍ وشرقـا
القلب من ما صار يبكي من الضيـر=والعين بأقشر دمعهـا اليـوم غرقـا
لا يا عديل الروح تشكـي المعاسيـر=لامن نـزل أمـر فـلا عنـه مرقـا
واللـي يبيـه الـرب مالـه معاذيـر=لو كانـت أريـاق المحاذيـر شرقـا
علـمٍ فجعنـي شيـن مالـه تعابيـر=فزيت ويدينـي مـن الغبـن عرقـا
قالو (علي ) صابـه مـن اللهِ تدابير=وتبدلـت بيـض الليـالـي بـزرقـا
رح يا(علي). . ياعل ماصار تبشيـر=لـك بالجنـان وعنـد مـولاك ترقـا
رح يا (علي) . . الله يذكرك بالخيـر=لك بالشـرف بيـن الأجاويـد طرقـا
رح يا(علي) . . ياعل ما جاك تكفيـر=وينجيك ربـي مـن عـذابٍ وحرقـا
موتك شرف مافيه ( غطوٍ) و( تفسير)=واللي جرى لك صـار غـدرٍ ودرقـا
أحسنت (للعامل) علـى نيـة الخيـر=وجازاك بالمعروف (طعـنٍ) وسرقـا
ولو دونـك العالـم دروع وطوابيـر=سهم القدر من بينهـم جـاك زرقـا
ويا عيال أبن روضان ربعي المناعير=تشهد لكم بالطيـب (روق) (وبرقـا)
لكم على الطـولات ثبـت وتقاريـر=ووسمتو المعـروف عرقـاً وعرقـا
ربـي يبـدل حزنكـم بالتسـاريـر=وتسجع سعادتكـم علـى كـل ورقـا
راعــــي مـــــرات / عبدالرحمن عبدالله المجلي
___________________
رثاء في فقد العم/ محمد بن عبدالعزيز المجلي حيث كان فقده حزناً على الجميع
- غفرالله له واسكنه فسيح جناته وأحسن عزاء ابناءه وبناته والجميع في فقده
______
البارحه ونيت من ضيقة البال
والقلب من زود العنى باح سـده
واسبلت دمعٍ عاصيٍ صعب لا سال
ياحيث صبري من الحزن وصل حده
دنيا العنى.. دنيا الشقى.. سعدها زال
علمٍ فجعني فج قلبي وقده
في موت عمي طيب الصيت والفال
يالله عسى الجنات داره وخده
إكميت من فقده لبس للحزن شال
وتبوك يغسل حزنه ببحر جده
يبكيك ياعمي صناديد ورجال
ويبكيك محتاجٍ ظروفه تحده
عز الخوي إن كان حمل الدهر مال
وسار الزمان الصلف عكسه وضده
وريف الضعيف ..وريف ..طرقي وجمال
وملجا يتيمٍ دمعته فوق خده
تشهد له الفزعات وفعوله جزال
في لازمٍ ماكل شخصٍ يسدّه
له رآية في عالي العز تختال
ومواقفٍ ياصعب حصره وعده
انا اشهد انه للمواجيب خيال
في ساعةٍ مافيه هاته.. ورده
وفيه التواضع للعرب مضرب امثال
مامرةٍ للناس صعر بخدة
يالله انا طالبك ياعالم الحال
عبدك ببابك يطلبك لا ترده
تجعله في الفردوس في خير منزال
ومن فيض عفوك يا إلهي تمده
وتحفظ عيال العم من شر واهوال
اهل الفعول الطايلة والأشدّة
متوارثين الطيب جيلٍ ورى اجيال
وحبل الوصل كلٍ حريصٍ يمده
وسنة إله الكون راحل ونزال
والموت عند الله ولا احد.ٍ يرده
___
عبدالرحمن بن عبدالله المجلي
ظ¢ظ×/ظ،ظ،/ظ،ظ¤ظ£ظ§---الأثنين
__________________
حروف ومشاعر حزن في وفاة الخال/ عبدالرحمن الحلوان
نسأل الله أن يغفر له ويرحمه ويجعله في جنات النعيم
يالله يالخلاق ياخير معبود
يافارج الكربات نور طريقي
حزنٍ بصدري داخل الجوف مرجود
والهم والتفكير اصبح رفيقي
الحزن بدل.. وضح.. الأيام بالسود
قلت آهـ ..واويلاه .. جرحي عميقي
من موت خالي جفت انهار وعدود
ومن فقد خالي شب جوفي حريقي
راعي الوصل .. نبع الوفاء..منبت الجود
راعي مواجيبٍ تسر الصديقي
يشهد له المسجد وخلق الله شهود
والجار يشهد له وكل الفريقي
مرحوم ياللي راح ما مس منقود
فعله ينومس كل حرٍ طليقي
يارب تغفر له عدد ذاري النود
وتسقيه من جنات عدنٍ رحيقي
وياعيال خالي طيبكم دوم مشهود
يبين لامنه نشف كل ريقي
البر..فيكم والوصل ترثِة جدود
متوارثين المجد فعلٍ حقيقي
ووصل الرحم لاشك دينٍ ومردود
يالله تساعدنا لحمله نطيقي
وتجعل أهلنا دوم في سهود ومهود
وتزيح عنهم كل همٍ وضيقي
وسنة إله الكون فاقد ومفقود
والموت حق و كل لحظة يويقي
واللي غفل عن جور الأيام مقرود
بقعى تبي تكويه حتى يفيقي
ويالله أنا طالبك والكف ممدود
يافارج الشدات نور طريقي
عبدالرحمن عبدالله المجلي
11/7/1437هـ
______________________
مشاعر حزن كتبت الجزء الأول من القصيدة
بلسان والد الفقيد الشاب/ فارس عبدالرحمن الروضان
غفر الله له واسكنه فسيح جناته
واحسن عزاء والديه واخوانه واعمامه واخواله وأقاربه وجبر مصيبتهم
الفقد موحش والحزن هدّ حيلي
والقلب من بين السراجيف منصاب
همٍ ترادم في حشايه ثقيلي
ينباج نور الفجر والدمع سكّاب
ياعين بزرق دمعك اليوم سيلي
لا تذخرين الدمع في فقد الاحباب
من موت ( فارس)..صحت واعزتي لي
قلت ..آهـ ..واويلاه ..واقصى الحشا ذاب
وناديت( فارس)؟!.. علّ صوته يجي لي
وعاد الصدى يدّوي.. بسمعي وينساب
وامسيت من فقده صويبٍ عليلي
ومن جور بقعاء طحت خايف ومرتاب
ياكبر حزني فيه.. وياطول ليلي
وياكثر ذكري له إذا ما الشفق غاب
ياربنا انت الذرى والوكيلي
ومن التجابك.. أو ترجاك ماخاب
تغفر ذنوبه يامنجي الدخيلي
وتقبله عندك دون تدّقيق وحساب
وتجعله في جنات عدنٍ نزيلي
في عالي الفردوس يارب الارباب
يسير في طوبى بظلٍ ظليلي
يقطف من ثمارٍ بها كل ماطاب
وتزيح عنهم كل حزنٍ ثقيلي
امه وابوه وكل ربعه والاقراب
ابوه قرمٍ للمكارم فضيلي
ما حط دون الضيف اسوار وابواب
واخوانه اللي للمراجل دليلي
البرّ فيهم والوصل دوم جذاب
شادّو بفعل الطيب رجمٍ طويلي
يشهد لهم كل الجماعة والأجناب
عن المراجل دربهم ما يميلي
دار الكرم دار المعزة والانساب
وبقعى ولو زانت تراها تعيلي
تخدع.. وتمكر ما تحسب لك حساب
جفيتها وحطيت قلبي دليلي
من كثر صكّات الزمن خاطري طاب
ودون القدر مابه ملاذِ يحيلي
الأمر لله وكل شيٍ له أسباب
وياسعد من حسب ليوم الرحيلي
من قبل تنعيه القرابه والأحباب
وازكى صلاتي يمّ طه الخليلي
اعداد ما دقّو هل البر منساب
عبدالرحمن المجلي - راعي مرات
_______________