مكشات يا دار الرجال المناعير=دارٍ بها ملفى قروم الرجالي 
لا يا صباح الله صباح التباشير=عليك يا مكشات يا ريف حالي
تعبت أدوّر واتعبتني المشاوير=مثلك ... ولكن ويييييين يا همّلالي
مثلك قليل ونادر وندرتك غير=مثل الجبال الشاهقات العوالي 
رجالك رجال الوفا فالمعاسير=ما دوّروا دار الخنا والميالي
ما دوّروا طرد الهوى والغنادير=ولا كثّروا هرجات قيلٍ وقالِ 
صغيرهم يضوي كما سالم الزير=يارد ولو صكّت عليه الليالي
وكبيرهم مابين حشمة وتقدير=رجلٍ عليه العلم أول وتالي
إن جت على الفزعات فزّوا طوابير=ما دوروا المقيال تحت الظلالي 
قبل الصباح وقبل صوت العصافير=مثل الحرار بنايف الوكر عالي
تنهّضوا يوم الخلايق مساهير=وإن نام ولد اللاش شفت الرجالِ 
وإن كانها علم وتجارب وتقرير=لقيت علم رجال في كل حالِ 
المعضلة تلقى حلول وتياسير=و للغايبة لا بد تلقى مجالي
الصيد بر وبحر ثم الصقاقير=وراعي السلوقي خيمته باعتدالي 
ومعالم الآثار والبر تنوير=وسياحة وعلم الفلك والحوالي 
و إبلٍ وخيل وبيئةٍ كلها خير=في كل علم إجابةٍ للسؤالٍ 
وللأجهزة تلقى جوابٍ وتفسير=وتلقى من التجهيز شيٍّ خيالي
وأشعار وألغازٍ لها ألف تدبير=والمشترى والبيع شرع وحلالِ
وضيافةٍ للي يجونه مسايير=بين الهلا والمرحبا والدّلالي
وش عاد باقي من علوم المناعير ؟؟؟؟=ووش عاد باقي من علوم الرجالي ؟؟؟
إلاّ إني أوقف لك تحيّة وتقدير=وارمي لك الغترة وأطوح عقالي