الوحدة في الصحراء

م يقول جدّي : م

جدّعنا شيلنا بالرياض ونكسنا نبي الحسا - هذه الأحداث تلي مباشرة عطش الصحراء (2 - يوم طلعنا من الرياض وجينا

عريق ببان وننزل جهة الجنادرية قبلة شمال ، وقالوا ماهنا ماء ، لغديك ياعبد الله تروح تجيب لنا ماء ترى الخفس به ماء

قلت : ليل ولا جيته قبل هالمرة !! قال : كلك بركة رح ما أدري ويش .. هوّن علي ، واروح أباري الجال ، يوم دريت ويلا

هالصراصير ويلا هذا الماء يبلص بالظلماء ، أومير أجي على حد الماء وأنوخه وأعقله وأنا فوق رقبته ، أخاف تقحص

وتنكس - مبروكة هاك الذلول سبحان الله بعضهن تقل رجّال - وأدش شوي مع الماء وأغرف وأغرف يوم أخذت لي شلقة

حروة تجي له ثلاثة أصواع ماء وأحزمه وأغرف للثانية مثله وأحطهن منّا ومنّا ، ويلا اللي حسه يخوض ويخوض بأقصى

الماء وأنا ما أشوف ظلما ، ما أدري هو ذيب ما أدري وشّو ، أومير أركب عليه وهي معقولة وأدلبح أتناوط العقال وأشتله

ويلا يوم عطية الله ... وأخليه تسمّح بهالظلما وماتحتاج تخبر ألايفه ، ويوم صار تالي الليل ويلاي واصلهم ، قال المعزب

قم ياعبيّد قم اطبخ لنا عشاء ، ويلاي دايخ واتلفلف باعبيتي وأنكب ، يوم قضى العشاء ويقومونن أتعشى ، يوم أصبحنا

قالوا : شف الوعد بارويغب وحنّا ننمشي ، أومير والله امشوا وخلّون !! وأقعد معي رعية أباعر .. وحيد .. وأرض ماعمري

جيته .. المراد دلّيت أمشي على شوي شوي والابل ترعى من هالربيع ، يوم جيت ارويغب أبي الرّبع وأنشد عنهم

ويلا هم ماجو !! ويلاه قايل لي لاجيت رويغب نزّل الأشدة والحدايج ، أومير أحجر البعارين وأدلّي أنوّخ منهن وأفك الحدايج

وأكوّم الحدايج كومة وهن منوخات ، يوم قضيت مكوّمهن وأنشد عنهم قالوا : أبد ماشفنا أحد !! والله أومير أرجع مع

دربي واقعد بالترابي اللي شمال الخفس وجنوب رويغب ، أرض به حمض وربيع والبعارين ماتبي الا تهجّع بس ، وانا

على البعير أحجّر البعارين ودي أرقيهن أبطلع شرق مع العرمة أغدين ألقاهم .. ويلا والله هاك الأرنب اللي بالشعيب

وأنا راكب أشوفه .. وأطخه يوم طخيته وطبيت ويلا على هاك الشوكة - شوكة طلح - وتضربن مع رجلي ويلا والله ما أقوى

آطى ، وأحاول أطلعه ويلا ماناب يمه - انا لله وانا اليه راجعون - وآخذ الأرنب وأعلقه وأكيل البارود وأركب ، وأحوّش البعارين

أبرقيهن وعجزت عنهن ، كل مارحت لجهة انكسن للجهة الثانية - انا لله - ويلا والله يوم صار العصر أو عقب العصر ويلا

هاك الأرنب الثانية - تقل فيران من كثرهن - وأثوّر عليه وأنوخ الناقة على حدّه وأتناوطه وأنا راكب ، ويلا اللي يقول : صايد

أبا عري ؟؟ بسم الله الرحمن الرحيم !! ماخبرت عندي أحد !! ويلا هاك المشنتف .. وش أنت ؟؟ قال : أنا دوّار ، ماشفت

لي أخويا .. مديد ماشفتهم ؟؟ قلت : لا والله ماشفتهم . قال : ماحولنا عرب ؟؟ قلت : لا أبد ماحولنا عرب ، أبد ما

ماشفتهم ، وحنا غابت الشمس هالحين نبي نمرح أنا واياك هنا ، ناكل الأرنب- مادري بالثانية - ولكن عطنا البل منّا

ومنّا ، ونحوش البل لين صرنا حدر الجال جال العرمة وانبرّك البل ونخليه تمرح ، ويلاي والله راز رجلي ما أقوى أمشي

قلت له : ياشيخ ماتطلع الشوكة ؟ تعال انقشه . قال : أبك والله ما أعرف ! - انا لله وانّا اليه راجعون - تعشّينا ويلا

باقي من عشانا- الأرنب كبيرة - قلت له : لا أصبحنا نبي ناكل تالي عشانا ونمشي يمكن نلقى اخوياك قدام ونطلع

مع جال العرمة - درب ردي لكن ماعليه شي - ونمشي يوم اننا توسقنا ويلا يوم انه لاقانا هاك المديد . قلت : يمكن

ذولا اخوياك وطب ولحقهم .. أنا بتلت .. شرّقت يوم أخذت لي اشوي أمشي ويلا ماشاء الله هالربيع ماتقول ، كل شي

زاهر طاير ، وهالبعارين بس تبي تاكل لكنه تمشي منحدرة ، ويلا والله هاك البييت قلت أبمره أغدي ألقى أحدن يطلّع

هالشوكة ماناب قاوي أمشي ، وأمر السلام عليكم ، وترد هاك العجوز عليكو السلام ، ويلا عنده بنت قلت له : وين

رجاجيلكم ؟ قالت : مادينن للرياض جالبينن دهن وبقل .. عندهم رعية ماتطالع اطرفه سارحة وحنّا الضحى حول الظهر

قلت تكفين يابنت الحلال بي لي شوكة ما تطلعينه ؟؟ قالت الا والله ابطلعه . وأحوّل عن الرحول وأنوخه وأعقله والبعارين

مفلية منّا ومنّا .. عشب ، والله ويلا هالعجوز ياشطره !! سبحان الله ، والله واطلعيّه ، قالت ياوخيي امرح عندنا وسع

صدورنا البنت الثانية سارحة بالغنم ؟ قلت : ياريت أشوف ان طاعت البل تمرح هنا ، وأحجّر البل أشوى وتمرح وأمرح

عندهن ، يوم صار بالليل والقطن ذاك الضرس ولا ذقت النوم ، قالت : أبك تبين أشده لك بالكلبة ؟؟ تبين أملخه ؟؟

قلت ايه تكفين !! أومير اضحكي علي هالعجوز واقلعيه ، قالت أجل أوخي من احسانك ان تقعد عندنا لين يجون أهلنا

يبون لهم يومين ثلاثة عندنا عشب وعندنا ... ؟ قلت : لا والله لاناب قاعدن عندكم ولا شي - عندك هالكرايب والحريم

أخاف يخمطنن أو بلاء - والله وأقعد عندهن الى حول الظهر ، ويعطنن بقل ودهن ، قالت : ياخوك ان حصل تمرح عندنا

فلا تذخر ؟ قلت : مايخالف . ويلا ماش متعلق قلبي أبدور هالخويا .. الحالي . وأجي منحدر من عندهن مشرق ويلا كل

أوين ماء بها لشعيب اللي هن على راسه من غرب ، توّه سايل . يوم دريت ويلا هاك الذيبين يبارنن كل مامشيت

مشن !! بيني وبينهن الشعيب بس - حوالي 10 أمتار - قلت هذولي يبن يروحن معي ويلا منّي نمت اهجمن علي

ويلاي امحطّن بالبارود رصاص ، وقفت أنا بشنق الشعيب منّا وهن بشنقه منّاك يتنشّن ويتناغزن ! قلت : والله ماناب

صابر اما انكس للحريم- عندهم كلب جيد - ويلاّ أحطّه بقلب حداهن وأذبحه والثاني يجيبه الله اما أكيله أو .. ان كانّه

ماهج ، وأثوّر عليه ويدلّي يقول كذا وكذا ويلا والله يوم شنقل ، خويه هج ، ويدلّي كل أوين يويق علي يسبرن وكل ما

مشيت ويلا اذانه من ورا شي يسبرن ، أنا انحدرت مانكست للحريم ، البعارين منحدرة ونكستهن كايده يمشن ويرعن

ويلا يوم غابت الشمس وأنا ماصليت - ذلّيت امنه أخاف لاغفلت أو نمت ينتقم لرفيقه ويهجم علي - قلت والله ماناب

ممرح الا بالنفود لو أتنى الصبح وأمشي يوم صار الله العالم يجي ثلث الليل حروة ، ويلا يوم انّي وصلت النفود وأحجر

البعارين ويلا يوم بعضهن برّك وشي عقلته أومير أنسدح بلا عشا ء ماغير شوي بقل وتمر . يوم انّي أصبحت وأدخل

بهالبدوان - متجمعين بالنفود - يوم لاقان واحد ، أبك أنت لحالك ؟ قلت : ايه الحالي وش تبي !؟ قال تبي تمرح الحالك !؟

قلت : ايه أمرح الحالي . وأقعد أتطلع عن ربعي وأنشد عنهم ، قالوا أبد ماشفنا أحد !! - لو أنا طمعن ماألقاهم

ماقعدت - المراد قعدت بهاك النفود ويلا هاك الراعي عند حويرات يجن لهن خمسة أو ستة . وأحجّر بعاريني . بعاريني

امفلية وهو مثل امفلية وأروح لمّه . السلام ؟ وعليكم السلام . الله حيّه ، وين أهلك ياولد ؟ قال : أبك مامعي أحد

قال لي : أنت وين اخوياك ؟ قلت أنا أدوّرهم هالحين . ماشفت رحيليين ماشفت أحد ؟ قال : لا والله أبد ماشفت أحد

قال لي : أغدينا نمرح أنا واياك ؟ قلت مايخالف نمرح جميع ، ونمرح وأسوّي ذاك العشي ، ويجيب ذاك الحليب وانتخاوى

أنا واياه لنا يجي نصف شهر بهالنفود ونلقى لنا فريق من عربه يعرفهم ........................................................ م

يوم بدا يحتر الوقت قال لي : ودي أسنّد ، أنت تبي تسنّد ؟ قلت ايه . ونسنّد أنا واياه ، ونحوّل مع العرمة ... وضيعته

ماأدري وين هو به بالضبط ، أظنّي ضيعته حول الحسي ، ماأدري هو قعد ؟ أو أنا لهجت عنه ؟ ويلاّ مهوجس أروح أنا

واياه لما نجي صعافيق - أهله بعسيله وهو عتيبي - المراد انّي ضيعته ، أومير أحوّل على نفود الثويرات وآخذ لي

به يجي أسبوع ، وتالد ذيك الناقة وأحلبه وأستانس ، يوم صار هاك اليوم وأنطلق من الثويرات وأضرب على المستوي

وأحوّل على المعزب ( الدولة ) قلت : دوك بعارينك الله لايبارك بك هكّيت علي - مربعة هالبعارين الوحدة عليه هالطول

من العشب - يوم جيت لأم سالم ويلاه طاقته عيونه ............................................................ والله المستعان